पूर्ण सार्की / डोल्पा । हिमाली जिल्ला डोल्पाको त्रिपुरासुन्दरी नगरपालिकाले सार्वजनिक सडक तथा अन्य सार्वजनिक स्थानमा गरिएको अतिक्रमण हटाउन ४८ घण्टे अल्टिमेटम दिएको छ।

नगरपालिकाले बुधबार एक सूचना जारी गर्दै पालिका भित्रका सडक, फुटपाथ, नाला, चौतारा लगायतका स्थानमा अनधिकृत रूपमा संरचना निर्माण, सामान राख्ने तथा व्यापार व्यवसाय सञ्चालन गर्ने कार्य बढ्दै गएको र यस्ता गतिविधि प्रचलित कानून विपरीत भएकाले तत्काल हटाउन निर्देशन दिइएको पालिकाका निमित्त प्रमुख प्रशासकीय अधिकृत थानेश्वर पनेरुले जानकारी दिए ।

उनले नगर क्षेत्रभित्र रहेका सम्पूर्ण अतिक्रमित सार्वजनिक स्थानमा राखिएका अस्थायी तथा स्थायी संरचना, टहरा, पसल तथा निर्माण सामग्री ४८ घण्टाभित्र स्वयं हटाउन सम्बन्धित सबैलाई आग्रह गरिएको बताए ।

तोकिएको समयसीमा भित्र अतिक्रमण नहटाएमा स्थानीय सरकार संचालन ऐन, २०७४ बमोजिम कारबाही गरिने नगरपालिकाले चेतावनी समेत दिएको छ। साथै, अतिक्रमण हटाउने क्रममा लाग्ने सम्पूर्ण खर्च सम्बन्धित व्यक्ति वा संस्थाबाट असुल उपर गरिने पनि नगरपालिकाले जनाएको छ।

हेर्नुहोस् सूचना