पूर्ण सार्की/ डोल्पा। हिमाली जिल्ला डोल्पाको ठुलेपाल्ता पाटनमा लुकीछिपी यार्सागुम्बा चोर्न जाने २ जना पक्राउ परेका छन् ।

जिल्लाको जगदुल्ला गाउँपालिका १ स्थित ठुलेपाल्ता पाटनमा लुकीछिपी यार्सागुम्बा चोर्न जाने सोही वडाकी ३२ वर्षीय लामु बुढा र जुम्लाको गुठीचौर गाउँपालिका १ मणिसागु बस्ने ३८ वर्षीय काली महतारालाई निकुञ्जको तोईजुमस्थित नेपाली सेनाको सुरक्षा पोष्टले पक्राउ गरेको शे-फोक्सुण्डो राष्ट्रिय निकुञ्जले जानकारी दिएको छ ।

निकुञ्जका अनुसार सुरक्षा टोलीले उनीहरूको साथबाट मोबाइल १ थान, झोला २ वटा, कुटी २ वटा तथा सलाइ २ वटा बरामद गरेको छ ।

पक्राउ परेका दुवै जनालाई आवश्यक कारबाहीका लागि शे-फोक्सुण्डो राष्ट्रिय निकुञ्जका सिनियर गेम स्काउट दीपक शाहलाई बुझाइएको जनाइएको छ ।

यार्सा संकलको लागि पाटनहरु नखुल्दै निकुञ्जले आफ्नो क्षेत्रभित्र लुकिछिपी यार्सागुम्बा संकलन गर्ने जाने २५ जनालाई यो भन्दा अगाडि पक्राउ गरिसकेको छ ।

यार्सागुम्बा संकलनको समय नजिकिँदै गर्दा डोल्पाका यार्सापाटनहरुमा सुरक्षा बढाइएको छ । यो वर्ष यार्सागुम्बा संकलनका लागि जिल्लाका सम्पूर्ण यार्सापाटनहरु जेठ १० गते खुल्ला गरिने निर्णय गरिएको छ ।

निकुञ्जले यार्सापाटनहरु आधिकारिक रूपमा नखुल्दै कोही कसैलाई चोरीको लागी पाटनतिर नजान आग्रह समेत गरेको छ ।