सुर्खेत : प्रेस सेन्टर नेपाल कालिकोटका अध्यक्ष तथा रेडियो तिला आवाजका स्टेसन म्यानेजर सञ्चारकर्मी वीरेन्द्र आचार्यको सडक दुर्घटनामा परी मृत्यु भएको छ।

सुर्खेतको वीरेन्द्रनगर नगरपालिका २ नम्बर वडा कार्यालय अगाडि शुक्रबार साँझ भएको दुर्घटनामा आचार्य सवार लुम्बिनी प्रदेश ३६ प ३८८६ नम्बरको स्कुटीलाई कर्णाली प्रदेश ०२००३ प १७४४ नम्बरको मोटरसाइकलले ठक्कर दिदा उनको मृत्यु भएको जिल्ला प्रहरी कार्यालय सुर्खेतले जानकारी दिएको छ ।

वीरेन्द्रनगरको मुलपानीबाट भुरेली तर्फ जाँदै गरेका २३ वर्षीय यामबहादुर शाहीले चलाएको मोटरसाइकल र ३४ वर्षीय आचार्यले चलाएको स्कुटी एकआपसमा ठोक्किँदा दुवै घाइते भएका थिए।

गम्भीर घाइते आचार्यको उपचारका क्रममा प्रदेश अस्पतालमा निधन भएको र मोटरसाइकल चालक शाहीको अवस्था मध्यम रहेको प्रहरीले जनाएको छ। घाइते शाहीको  टाउकोसहित शरीरका विभिन्न भागमा चोट लागेको प्रहरीले जानकारी दिएको  छ।मृतक सञ्चारकर्मी लामो समय देखि सञ्चार क्षेत्रमा सक्रिय थिए। सञ्चारकर्मी आचार्यको निधनसगै सिंगो कालिकोट अहिले शोकमा डुबेको छ।

मृतक सञ्चारकर्मी आचार्य प्रति हार्दिक श्रद्धाञ्जली ।