डोल्पा । राष्ट्रिय स्वतन्त्र पार्टी (रास्वपा) की समानुपातिक सांसद विदुषी राणाले कर्णालीका बहुमूल्य जडीबुटी संरक्षण तथा व्यावसायीकरणका लागि आधुनिक प्रशोधन केन्द्र र भण्डारण गृह तत्काल स्थापना गर्न सरकारसँग माग गरेकी छन्।

आज बसेको प्रतिनिधिसभा बैठकमा बोल्दै सांसद राणाले कर्णाली प्रदेश, विशेषगरी डोल्पा लगायतका जिल्लामा पाइने यार्सागुम्बा, जटामसी तथा अन्य बहुमूल्य जडीबुटीहरू प्रशोधनविहीन अवस्थामै न्यून मूल्यमा बाहिरिने गरेको बताइन्।

उनले कर्णालीमा उत्पादन हुने बहुमूल्य जडीबुटीहरु प्रशोधन बिनै कौडीको भरमा बिक्री हुने गरेको भन्दै जडीबुटीको संकलन, प्रशोधन र ब्रान्डिङमा राज्यको पर्याप्त ध्यान नपुगेको उल्लेख गर्दै तत्काल आधुनिक प्रशोधन केन्द्र र भण्डारण गृह स्थापना गर्न माग गरेकी हुन । समानुपातिक सांसद राणालाई रास्वपाले डोल्पाको जिम्मेवारी सुम्पिएको थियो ।